"ghadi..."
Aur dopeher ka samay hai...
Sahi sahi waqt kya hua hai pata nahin...
Main humesha ki tarah kuch bhi nahin kar rahi hu aur achanak se aawaz aati hai kitchen se... "bebo time bataogi... Mene tumhari favourite aloo jeera ki sabzi banayi hai... Jaldi kha k apan ko movie jaana hai na... Late to nahin ho rahe? Jaldi time batao na..."
Itni saari baatein ek sath keh gaya wo... Humesha ki tarah...
Aur main ye sun ke... Apne Hath me rakhi uski hi ghadi jo ki ab purani ho chuki hai aur band hai...
Jo din me bas do baar sahi waqt bata rahi hai...
Pichhle kayi saalon se...
Thodi si jung bhi lag gayi hai usme...
Patte puraane se ho gaye hain...
Unme bhi waisi hi jhurriyaan hain jaisi main apne chehre pe mehsoos kar rahi hoon is waqt...
Aur saundhi si khushboo aati hai jaise usne abhi abhi ghee me jeere ka chhaunk diya ho...
Aur me kehti hoon ki "khidki to khol lo... Kitna dhuaan ho raha hai...
Tumko kuch banana hi nai aata... Humse kuch seekhoge nai kya"
Tab hi wo fir se bol utha "arey bana rahe na jaldi jaldi... Tum taiyar ho jao aur hume time batao na"
Fir se hum ghadi ko dekhte hain to dikhta hai ki arey ye ghadi to band hai... Aur kehte hain "2 baje hain abhi bhi time hai..."
Ye kya hai... "kaun ho tum?" maine puchha... Ek Ladki se jo achanak mere saamne aake khadi ho gayi... Bolne lagi "MAA aapse milne patient aaya hai aapka..."
"Arnica maa... Aap humesha dopeher ki neend se uth ke hume bhool jaati ho... Aaj kya sapna dekha batao"
Arnica... Meri beti... Kitni badi ho gayi hai... Kitni sundar dikhne lagi h...
Usne bhi aaj meri favourite aloo jeere ki sabzi banayi hai...
Aur me waqt dekhti hu... 2 baje hain... Uski ghadi!aaj bhi ruki hui hai...
Kitne saal ho gaye chali hi nahin...
Uska ek patta halka sa aaj bhi toota hua hai...
Us ghadi ko dekh k aaj bhi wo din yaad aagaya... Wo raat jab maine usey us bangalore wali bus mein uske birthday se 2 mahine pehle hi usey uska gift diya tha... Apne haathon se poora dil lagakar sabse zyada pyaar se usey pack kiya tha...
Ek pal ke liye socha nahin deti hoon...
Baad mein dungi... Per uske chehre ki us muskaan ko dekhne k liye rok hi nahin paayi....
Dena hi pada..
Dekh kar hi kehne laga " arey iski kya zaroorat thi... Tu hai na mera tohfa... Poori zindagi ke jo birthday gaye unka bhi aur jo aayenge unka bhi... Bas Tu sath rehna... Vaada kar...!
Mene kaha... Dil pe hath rakh kar" achha haan baba promise... Ab baatein hi karoge ya dekhoge bhi... Itne pyaar se laayi hu na... Itni jaldi kyu khol rahe... Pyaar se... Mann se pack kiya hai... "
Meri taraf dekh kar bas wo muskaan uske chehre per... Jisko dekhne k liye kab se betaab thi...
" arey waah... Itti sundar ghadi... Mere liye"
Khushi ka thikaana nahin tha uski...
Humesha ki tarah uski wo puraani aadat se baat nahi aaya aur bol baitha "mehengi hogi na ye..."
Aur main gusaate hue "mat kiya karo aise.... Mujhe laga achhi lagegi tumhe..."
Gale se laga liya usne... Kitni sundar raat thi na wo... Thandi si hawa... Aaryan... Main... Aasmaan... Aur khushiyaan...
Kitna sundar waqt tha...
Aur aaj... Abhi 2 baj rahe hain... Fir se ghadi dekhi aur har wo suhana pal wo waqt... Achha... Bura... Har waqt har roz ki tarah aankhon k saamne se guzar gaya....
Bas yaadein reh gayi hain... Uski...
Uske ehsaas ki....
Uski khushboo...
Uska gussa...hey bhagwaan... Uske gusse ki wajah se na jaane kitni baar mann kiya chhod du usey... Per kya karti... Pyaar karti thi na usse... Kaise chhodti.... Vaada kiya tha na usse... Ki main humesha rahungi....
Aur aaj wo khud apna vaada tod k jaa chuka hai.....
Kitni door.... Dikhta bhi nahin.... Aur bas har roz.... Dopeher ko aajata hai.... Sapne mein...
Apni wahi puraani yaad lekar.... Wahi khushboo le kar...
Kaash... Tu bas ek tasveer nai reh jaata... Paas hota... Apna naam nitika se jod kar.... Arnica de gaya... Kitna yaad karti hai wo tujhe.... Tujhse bhi zyada mera khayal rakhne lagi hai.... Uski aankhein dekh kar tu dikhta hai....
Humesha kehta tha na ki "dekhna Arnica ki aankhein mere(Aaryan ke) jaisi hongi..." sach kehta tha...
"Mumma fir akele akele muskura rahi na aap.... Mujhe bhi batao.... Aaj aapki aur papa ki konsi baat yaad aayi?..... "
Haste haste main apni doctor beti ko uske papa ki ghadi dekar baahar chali gayi....
- आर्यन....